「AO狗仔隊」所涉公帑 許智峯要政府交代

【明報專訊】近年每當立法會審議重大法案時，政府都會派出俗稱「狗仔隊」嘅政務主任睇實議員出入，點算人數，防止投票甩轆。民主黨立法會議員許智峯（圖）就覺得「狗仔隊」對議員造成壓力，加上佢哋會記錄議員出入，令有啲議員覺得唔被尊重，民主黨黨團將會去信政務司長張建宗，要求政府交代「狗仔隊」涉及幾多公帑、人手，同埋會點用蒐集到嘅議員出入私隱。阿峯話，如果政府解釋唔清楚，就會向私隱專員公署投訴。


阿峯噚日同傳媒茶敘嘅時候就話，以前對「狗仔隊」無咁大關注，但經歷咗早前財委會迪士尼撥款表決，佢覺得「狗仔隊」明顯影響到建制派投票嘅立場，又認為如果無「狗仔隊」住，有小部分建制派可能會改變投票立場，撥款就有機會被否決喎。


立法會財委會早前以30票贊成、24票反對，通過向迪士尼樂園注資54.5億元以作擴建。