舊大澳警署 林鄭一見鍾情 話日後管治重感情 唔答橫洲逼遷

【明報專訊】候任特首林鄭月娥做緊發展局長嗰陣，曾經強硬拆卸中環皇后碼頭，同時亦推動保育舊大澳警署。噚日林太出席大澳文物酒店5周年活動，話酒店見證香港歷史，顯示同社區融合，又保留人情味，而自己做特首目標係建設「更美好香港」，日後管治風格希望係「富人情味」同「重感情」。
話當年「頹垣敗瓦」 提出做旅遊基建
林太諗起10年前初嚟大澳，當時未活化成酒店嘅舊大澳警署一片「頹垣敗瓦」，但佢一見到就愛上呢幢建築，覺得好有歷史價值。林太又申報，話當年做發展局長，無參與「活化歷史建築伙伴計劃」評審，只係提出想舊警署成為旅遊基建，「出現喺旅遊書」。林太噚日致辭主動談人情味，佢走嗰陣，記者就問佢橫洲發展要村民遷走係咪無人情味，林太就無回應。
舊大澳警署現已變身酒店，由信和家族成立嘅香港歷史文物保育建設有限公司營運。信和集團執行董事黃永光喺特首選舉期間力撐林鄭，而林鄭噚日亦畀面去大澳。林鄭出席酒店慶祝活動之後，就同工作人員一齊行大澳社區，參觀下蝦乾蝦醬廠等，而以香港歷史文物保育建設有限公司董事身分現身嘅黃永光就無一齊行街，黃永光同Emily講，林太已經大把人陪。
講番大澳文物酒店，為咗慶祝5周年，由即日到7月底有優惠，但條件多多，每個星期有一間房嘅首晚房價只係550元，只限周一至四先可以住，仲要親自打去酒店訂，先到先得。酒店暑假個時仲會推出「大澳探索體驗遊」，住客可以跟導遊入漁村睇棚屋同鹽田遺址，都幾有趣。