立會長者議員增至9人 黃國健張華峰同年同月同日生

【明報專訊】立法會近日多咗兩個議員榮登65歲長者行列，夠資格攞長者卡用兩元搭車，除咗經民聯張華峰前日生日，工聯會黃國健（KK）原來都係同日生日，佢哋都係事後先知道大家同年同月同日生，而張華峰都話應該要搵KK飲番杯慶祝。
黃﹕兩蚊搭車慳好多
工聯會黨友及職員都同KK賀壽，仲送咗張道具長者卡畀佢，話KK發達喇，可以兩蚊搭車。KK同Emily講，以後真係可以慳番好多，因為住喺北區嘅佢，日日都搭巴士往返立法會。Emily問KK生日願望，佢話自己啲願望好行貨，想社會和諧啲，同埋身體健康。KK外表睇嚟keep得唔錯，但佢話自己十幾年前已經有三高問題，可能同遺傳有關，所以都有食降血壓藥、膽固醇藥等，但醫生話佢只要均衡飲食就得，唔需要戒口。Emily就祝KK心想事成。
隨住KK同張華峰過65歲，現時立法會68名議員入面，「長者名冊」至少有9人，當中以經民聯石禮謙最年長，已屆71歲，而9人中經民聯佔4位，睇嚟人生經驗最豐富！