海空拯救匯演 市民﹕真實刺激 每年5．1定為水上安全日

【明報專訊】夏天泳季就到，香港拯溺總會及香港游泳教師總會為咗令市民注意水上安全，決定將每年嘅5月1日定為水上安全日；噚日仲因為要慶祝香港回歸20周年，喺淺水灣聯同消防處、政府飛行服務隊等多個政府部門及團體舉辦「海空拯救匯演」，吸引唔少市民近距離觀看直升機同消防船等出海救援嘅情况。
大會安排兩隻船模擬相撞冒煙，再出動水上電單車、救生快艇出海救人，最後飛行服務隊直升機出動，由救援人員救走傷者。有市民覺得匯演真實刺激，明白到游水時要加倍小心；有唔識游水嘅小朋友睇完都話「如果我要救人，就要先學識游水」。
噚日大會仲喺淺水灣舉辦咗「香港3000公尺水上安全長途暢泳」，有超過1850名參賽者，年齡由4歲到76歲都有，大會安排佢哋每人身上掛住塊浮板以保安全，同時提醒大家注意水上安全，減少意外發生。
消防處長李建日亦有到場喺海上檢閱儀式上擔任檢閱官，睇住由消防處、海事處、警務處、香港海事青年團、香港童軍總會等13個政府部門及團體各自派出嘅船喺海上列隊行駛。