北大教授倡港獨分子驅逐出境

【明報專訊】今年係香港回歸20周年，多個團體都邀請本地、內地專家學者搞一國兩制、基本法嘅研討會，有啲學者都可以話係語出驚人。例如噚日出席活動嘅北大法學院教授陳端洪（圖）就向台上嘉賓請教，佔中運動嘅活躍分子同支持港獨嘅人，有幾多人有中國公民資格，質疑「他們憑什麼向國家激烈地提出政治主張？」佢甚至提議，法律上可否用「驅逐出境」嘅方式處理呢批人。


幫港：只重英文教育令港人崇洋

台上幾個法律界人士都你眼望我眼，搖頭話無數據，城大法律學院教授顧敏康就附和話「理論上完全贊同這個觀點」，認為如果呢啲人係雙重身分，咁喊出港獨口號就無正當性。不過港區人大代表黃友嘉就解釋，香港包容性強，例如合資格選民唔需要係中國公民，只需係香港永久居民。佢認為有必要維持呢種包容，侵犯香港主權嘅行為應該用其他方式處理比較恰當。


「幫港出聲」發言人鄭赤琰就建議為《基本法》第9條釋法，確立中文嘅官方地位。佢話如果注重英文教育，港人只會一味崇洋，講中文似乎變成次等。不過因為講者發言時間都好短，佢就無具體解釋點樣釋法。