陳美齡做教育局長？ 葉建源：好有創意！

【明報專訊】候任特首林鄭月娥正努力組班，《眾新聞》噚日報道，有史丹福大學教育博士學位嘅藝人陳美齡，係其中一個林太有邀請出任教育局長嘅人選，陳美齡回應時就話唔可以評論，但如果大家都希望，「我喺任何崗位都願意」。


候任特首辦發言人回覆唔能夠透露組班工作。據Emily了解，林太曾經接觸唔同人選，但唔少人都婉拒加入政府。教育界立法會議員葉建源噚日就話對呢個報道感到「吃驚」，「無諗過（陳美齡）係人選之一」，覺得「好有創意，令到大家think out of the box」。


質疑陳不熟悉港教育問題

葉建源話，佢有睇過陳美齡著作，相當欣賞佢對教育嘅睇法，但係做局長要熟悉行政體制，亦都要熟悉香港教育情况，質疑之前長居日本嘅陳美齡，「對香港教育有幾多了解？實際問題係咪掌握呢？（局長）一定要熟悉實際情况」。


1980年代遠嫁日本 安倍做伴郎

三聯書店前日為陳美齡新書《40個教育提案》舉行新書發佈會，當日做主持嘅拔萃男書院前校長張灼祥就同Emily講，佢覺得陳美齡對教育好有心，如果做教育局長都係件唔錯嘅事，所以當時就半講笑咁提議陳美齡做局長，對方當時都係笑下，無直接回應。張灼祥話如果最後成真，係純粹巧合，話自己無同陳美齡夾過，都無收到咩消息喎。


61歲嘅陳美齡，1970至80年代係歌手，曾經出版多張專輯，30歲嫁咗畀日本經理人金子力，日本首相安倍晉三係佢哋結婚時嘅伴郎。但陳美齡無入籍日本，仲係拎香港身分證同護照。