復星管理層換血 生力軍買股顯決心

【明報專訊】復星國際（0656）總裁梁信軍早排宣布辭職，唔少人都慨歎創辦人「復旦五劍俠」散band，不過，正所謂舊嘅唔去新嘅唔來，復星新一代管理層都係時候開始接棒，做唔做到嘢仲要觀察，不過新董事之一王燦同徐曉亮每人就已經各自使成百萬，真金白銀買股票表示誠意。


睇返聯交所資料，啱啱升職做聯席總裁嘅徐曉亮，星期一用咗總共115萬元增持咗10萬股復星股份，而「掹車邊80後」、今年38歲嘅王燦就分兩日買貨，都係買咗10萬股，同樣使費都係約莫115萬元。


新董事各花百萬買貨

之前梁信軍宣布辭職，唔少復星支持者同公司同事都有唔捨得，不過好似董事長郭廣昌話齋，就算職業足球員都要換血，而家呢班生力軍未上陣先畀錢以示決心，希望唔好令股東失望啦！

[小琴密語]