田北辰領幼園生遊立會

【明報專訊】立法會議員不時都要帶學生行立法會，包括幼稚園小朋友。建制派議員田北辰噚日就喺facebook話，星期三朝早化身「田導遊」，帶元岡幼稚園學生參觀立法會。


田北辰話，佢好敬佩元岡幼稚園呂麗紅校長，諗返幾年前曾經到訪元岡幼稚園，當時已被被呂校長嘅教育熱誠深深感動，因對方唔教國際學校而走去做「五個小孩的校長」，月薪得4500蚊，最終成功令學校起死回生。田北辰話，當年嘅小朋友已經全部畢業，學校學生亦由5個變成幾十個。


唱「歡樂今宵再會」送別學生

田北辰帶住班小朋友參觀立法會大樓嘅空中花園，逐一介紹周邊嘅建築物，提到特首辦，竟然有同學仔舉手話將來想做特首。臨走佢仲向學生唱咗句「歡樂今宵再會」，相信班小朋友肯定唔知佢唱乜，但學生亦送返首《Goodbye my beloved friends》畀佢。