字樣模型扭蛋機花40萬 曾俊華5.2萬請人練口才

【明報專訊】特首選舉裏面擅長打公關戰嘅曾俊華，競選開支同捐贈詳情噚日曝光，原來經常「陪伴」佢落區接觸市民嘅3個大型字樣模型（信任、團結、希望），設計連製作花咗超過20萬元，派街坊嘅1萬個襟章就花近14萬元，至於同樣受歡迎嘅1萬件扭蛋，計埋扭蛋機開支，花費同樣超過20萬元。


曾俊華競選後期到過西九龍中心落區，喺嗰度曾經擺放過扭蛋機等，原來西九龍中心當時免收曾俊華約6.2萬元場租，當係選舉捐贈。不時予人感覺「口窒窒」嘅曾俊華，亦花咗近5.2萬元訓練辯論同應對傳媒技巧，包括用3萬元聘請傳媒人黃潔慧訓練辯論。


曾俊華兩個女對手林鄭月娥同葉劉淑儀競選時都有請人化妝，原來曾俊華喺3月19日嘅選舉論壇，都有請人化妝，盛惠3000元。


另外，曾俊華競選辦主將羅永聰唔收錢做義工，原來佢任職大律師嘅胞兄羅敏聰，仲捐咗9萬元現金畀曾俊華，兩兄弟可謂出錢出力。Emily噚日致電羅敏聰，被問到點解捐錢，佢回應話「支持下，咩都好啦」。曾俊華最終落選，羅敏聰又有無覺得失落呢？佢形容「咁呢個無辦法啦，現實係咁」，自己希望保持低調，唔想講太多。