AO歌神離官場近兩年 楊立門主持港台回歸節目

【明報專訊】前民政事務局常任秘書長、人稱AO歌王嘅楊立門離開官場差不多兩年，除咗做歌手開演唱會，最近仲幫港台慶回歸節目《香港有你》做主持，訪問唔同界別嘅兩代人。楊立門話，將會喺古典音樂嗰集獻唱，至於唱咩歌，要先賣關子，到時觀眾都可以免費聽到AO歌王嘅歌聲喇。
節目《香港有你》一連10集，喺下月17日開始逢周三晚6點同8點半，分別喺無綫電視同港台電視31台播出。每集會以建築、醫療、時裝等唔同界別做主題，醫療嗰集就訪問咗本身係醫生嘅中大校長沈祖堯，同港大醫學院院長梁卓偉。
楊立門話，曾經喺97年回歸交接前夕嘅晚宴上做過主持，都有小小經驗，過去30幾年係政府做過唔同部門，對唔同範疇都有一啲認識，可以同唔同嘅受訪者交流係好開心嘅事，所以佢無問報酬就答應咗做主持。
下月任廠商會總幹事
楊立門又話，嚟緊下個月8號將會正式返一份新工，就係中華廠商聯合會嘅總幹事，以往工作做過工業處、工商科技局同埋工業貿易處，都好有感情。佢仲話，廠商會呢份工限制唔多，可以畀佢喺公餘時間唱歌。