健康快車返港 推廣「糖網病」

【明報專訊】1997年7月成立嘅「健康快車」火車醫院，多年來喺內地為貧困白內障患者提供免費手術治療。成立20周年，「健康快車」會返嚟香港，向香港市民推廣「糖網病」嘅知識，5月22日至26日喺德福廣場，6月5日至8日喺青衣城，為預先登記嘅市民做眼底篩查，預計每日有100個名額。
港大醫學院眼科學系臨牀副教授王逸軒醫生話，糖網病係常見同嚴重嘅糖尿病併發症，係主要致盲眼病之一，要及早發現先可以及時避免患者喪失視力。臨牀助理教授陳焯鴻補充，糖網病可分為三級 ，一至二級唔會致盲，但去到三級就要盡快醫，如果唔係，視力可能短時間內嚴重惡化，甚至會盲。
陳焯鴻仲話，最近約17.5萬人喺公立醫院糖尿病做咗糖網病眼底篩查，發現39%有糖網病，當中更有9.8%已經去到二至三級嘅嚴重視力受損程度，情况值得關注。健康快車香港基金主席方正話，「健康快車」計劃在下半年喺社區試推糖網病眼底篩查服務，等更多香港市民了解同埋認識糖網病。