律師會訪京晤馮巍 倡增加釋法透明度

【明報專訊】香港律師會理事會於周日一連四天低調訪京，先後會見港澳辦、最高人民法院、司法部等，噚晚返港。今次係律師會換屆後會長蘇紹聰首次率團，佢話係例行拜會，談及香港法律界關心嘅議題，例如同港澳辦副主任馮巍會面時，就釋法提出意見。


蘇紹聰話，上年人大釋法引來港人擔心，重申希望中央喺迫不得已下先採用釋法最後一步。佢向馮巍提出兩大建議，包括增加釋法過程透明度，形容過去「釋得好似好急」，又希望基本法委員會喺傾釋法細節時，吸納更多港人意見。蘇紹聰引述馮巍話建議具建設性，透露中央正研究如何完善釋法程序。


律師會亦提出，希望內地開放國家政府機構畀本港年輕律師北上短期體驗，例如法院、檢察院甚至公安部等，等佢哋了解內地運作，馮巍回應話積極考慮。至於嚟緊最具爭議嘅「一地兩檢」議題，蘇紹聰就話無詳談，又稱政府公布具體方案後，律師會先會商討立場。