林鄭競選 購11張新八達通 「重製」27件T恤 每件約$555

【明報專訊】候任特首林鄭月娥競選時曾因為喺港鐵唔識用八達通拍卡出閘，被人批評「離地」，選舉事務處噚日公開林太競選開支詳情，文件顯示競選辦喺競選期內，總共買咗11張新嘅八達通卡使用，相信係為咗方便申報開支，但就未知林太用嗰張係咪其中一張喇。


取消網頁帳戶開支$2000

林太競選時開設facebook專頁同網民「connect」，佢喺1月26日至2月26日一個月內，已經花費最少30萬元管理專頁。林太另外申報咗2000蚊開支，聘請公司喺下年3月幫佢取消（cancellation）fb帳戶、YouTube帳戶同競選網頁。林太長子林節思任職內地手機公司小米，文件顯示競選辦買咗3部小米型號嘅手機，盛惠約4500元。


林太2月初喺會展舉行競選分享會，佢同助選團當時著住特別訂製嘅藍色T恤登場。


稱曾改競選口號 新春趕製

文件顯示當中有27件T恤共1.5萬蚊，即每件555蚊，發票特別註明呢27件T恤係「Reproduction of T-shirt（From Reconnect to Weconnect）」。林營中人話reconnect曾係競選口號，但最終決定用We connect，而趕製T恤適逢農曆新年，工廠要趕住收爐，要特別開工印製，故價錢偏高。


如果大家仲記得，林太分享會當日化咗個「回春妝」，出自星級化妝師Gary之手，單據顯示呢個妝盛惠2000蚊。而林太老公林兆波喺太太當選當日，同林節思一齊送花祝賀，原來同樣屬競選費用，文件顯示競選辦為呢兩束價值2500蚊嘅鮮花申報咗選舉開支。