工聯會倡中環街市變美食廣場

【明報專訊】政府就《香港2030+》嘅諮詢期本月底結束，工聯會噚日公布以「拓產業、創職位、樂生活」為主題嘅報告，就香港5區發展提出多項建議，稍後會遞交到發展局，商討如何落實。


Emily發現，建議中唔少都係針對各區特色度身訂做，如港島就倡議將中環街市改建本土美食廣場，以廉價租金租畀食肆經營本地美食，再結合鄰近蘭桂坊、大牌檔等，成為特色旅遊線。西九龍方面，議員陸頌雄提出，因新發展空間有限，所以應喺重建項目中撥出零售空間，將旺角變成動漫、電玩、流行文化熱點。佢又話，深水埗等地近年流行手作，可以發展「工匠」文化，推廣傳統及新興工藝產業。


至於最近有意參選新東補選嘅鄧家彪就話，新界東應發展綠色經濟，例如推廣優閒農業、發展民宿，甚至喺落馬洲、沙頭角同深圳搞跨境單車遊。佢又要求政府應改善新東交通承載量，盡快研究興建多一條由南至北嘅新界鐵路線。