慶回歸 鄭耀棠搞機械人真人羽球賽

【明報專訊】今年係香港回歸20周年，政府隆重其事籌備咗多場活動，每年慶回歸都有自發搞活動嘅香港各界慶典籌備委員會，今年同樣唔執輸，會搞搞新意思。慶委會成員之一嘅工聯會榮譽會長鄭耀棠透露，今年自己負責創新科技呢瓣，正密鑼緊鼓搞緊個機械人大戰真人嘅羽毛球比賽。


至於搵咩對手挑戰機械人，有花生友提議，候任特首林鄭月娥聽聞打羽毛球都有兩手，話唔定可以互相切磋一下，棠哥聽到都大笑有得諗，一定有噱頭。


佢又話自己前排到大灣區考察時得到啟發，發現佛山機械人發展好先進，畀佢哋嘅機械人舞獅吸引咗，仲打算到時攞番對擺喺活動場地門口贈興。至於仲想知民間慶委會有咩大搞作，棠哥就賣個關子話下個月就會開記者會正式宣布，叫大家畀啲耐性，拭目以待。