月初退出新民黨 田北辰登「十大議員」榜首

【明報專訊】香港大學民意研究計劃噚日公布「 十大立法會議員評分」，喺本月初退出新民黨嘅田北辰（圖），登上十大議員嘅榜首，有56.1分；排第二同第三位嘅分別係朱凱廸和民主黨涂謹申，前者有52.5分，後者有51.8分。


港大民研喺4月以電話隨機抽樣方式做有關民調。要躋身「十大議員」，先決條件係市民嘅熟悉程度，然後再按支持度排名，所以「十大」以外嘅議員可能有好高或者好低嘅支持度，只係熟悉度唔夠所以唔喺榜內。市民對香港眾志羅冠聰嘅熟悉程度，無3個月前咁高，所以阿聰跌出「十大議員」，由田北辰取而代之。田北辰係繼去年10月後，再次晉身十大。


新民黨葉劉淑儀、毛孟靜、公民黨陳淑莊、民建聯李慧琼分別排第四至第七位，各人得分為48.5、47.9、46.6同44.5分；排第八至第十位嘅議員係民建聯蔣麗芸、劉小麗同社民連梁國雄，佢哋分別有38.2、37.4及36.5分。