續讚張宇人勝任局長 鍾國斌﹕你知佢得 劉慧卿﹕唔係嘛

【明報專訊】民主黨前主席劉慧卿（卿姐）噚日訪問自由黨黨魁鍾國斌（Felix），Felix話黨主席張宇人唔肯做局長，但笑住同卿姐講「你識佢（張宇人）咁耐，你知佢係得嘛」。卿姐聽到就大叫一聲「唔係嘛」，但Felix隨即舉例讚張宇人當年做立法會財委會主席做得幾好，「你幾時見張宇人做主席時，有人衝過（主席台）？」


讚做財會主席 「無人衝過」

Felix出席卿姐主持嘅網台節目《議會內外》，佢喺節目上透露，聽聞現時候任特首林鄭月娥真係好難搵人做局長，話以前做官有好多人尊重，「但家嘅尊重度降得低啲」，亦指家人反對係關鍵原因。Felix話現時個「廚房」實在太熱，有時官員講錯一句半句，身邊人、家人都會受影響。


建制、泛民政黨負責人將會喺5月初搞「破冰」飯局，Felix話大家第一次食飯無特別議題，「大家聯絡吓感情先」，將來有機會合作時會更容易溝通。Felix認為，雙方未來可以先喺無咁有爭議嘅民生項目上合作。