重開公民廣場 與劉國勳唱反調 周浩鼎：民記共識先評估保安

【明報專訊】政府換屆在即，近期政圈熱炒重開俗稱「公民廣場」嘅政府總部東翼前地呢個議題，建制泛民都有人和議，其中民建聯劉國勳更有實質動作，早前去信政務司長張建宗提出要求，連候任特首辦日前都回覆指會考慮重開。不過，唔知劉國勳係咪太早跳出嚟講，呢件事引起民建聯內部出現分歧，民記副主席周浩鼎噚日喺大氣電波急急澄清，指民記黨團經過深入討論後達成共識，應先做好保安風險評估。


周浩鼎解釋，唔應該急於重開政總東翼前地，因為現時社會氣氛未有明顯轉變，而過往亦有示威者曾經爬過欄杆及利用硬物衝擊，不得不考慮保安因素。


黨友周浩鼎公開喺電台上唱反調，但劉國勳都無轉軚，強調自己睇法一直無改變，佢噚日朝跟民記見林鄭月娥時，亦再度當面提及重開公民廣場。其實今次並非民記首次出現分歧，例如年前版權修訂條例草案，周浩鼎亦一度提出可支持泛民其中一項修訂，但好快就被領導層否定咗。


工聯會撐重開

至於其他政黨，工聯會噚日亦表態贊成重開公民廣場，認為長期關閉對政府形象有影響。香港眾志羅冠聰則認同應恢復政府總部「門常開」嘅設計，不過對於做法能否修補撕裂，做到和解，佢就表示存疑，「就算係有善意，都遠遠未到呢種程度」。