旅業話恩平溫泉不及日本 試過旅館唔開燈 牆上有死蚊

【明報專訊】財政司長陳茂波早前去完粵港澳大灣區考察後，前日喺一個電台節目叫大家去恩平浸溫泉，「有啲人去恩平，住一晚浸吓溫泉，唔需要去到日本咁遠」；不過，有旅遊業界人士就話，4、5年前去過恩平浸溫泉，旅館黑、無開燈，牆上仲有死蚊(口添)。
蒂旅（亞洲）旅遊服務經理陳世棠話，佢大約喺4至5年前上過恩平浸溫泉，旅館無開燈，當佢問職員點解唔開燈，職員話要慳電。
似「白飯魚」比名牌波鞋
佢浸浸吓溫泉仲發現牆上有死蚊，認為真係唔能夠同日本比較，形容陳茂波嘅講法就好似叫人將「白飯魚」（白膠鞋）同名牌波鞋做比較。佢仲講笑咁話，要問吓司長喺邊間浸，可能佢浸嗰間比較好。
可能「陳茂波浸嗰間較好」
香港旅遊業促進會總幹事崔定邦就話，同內地旅行社朋友傾過，恩平真係有溫泉水，但唔同嘅溫泉旅館嘅管理質素參差，認為如果要將恩平同日本比較，就仍然有一段距離。