林鄭去新界 何俊賢倡填海解土地問題

【明報專訊】候任特首林鄭月娥（圖右）噚日去到新界，出席「林太與您同行新界各界聚會」，同當區人士見面。有份出席活動嘅漁農界立法會議員何俊賢話大家同林太傾咗個幾鐘，由拉布到醫療都有討論。


何俊賢話會上向林太表明，希望新政府可以用新方法處理社會矛盾，例如可以填海去解決房屋土地問題，其他與會者關心大灣區發展、新理財哲學，以及兒童權益等。何俊賢仲話有邀請林太再搵時間去同漁農界人士見面，話業界都有好多議題希望同林太反映。


據中通社報道，林太會上話，上任後會喺公共財政穩健嘅情况下，更多投資有長遠回報嘅地方，如基建發展、人才培育、教育方面等。林太亦話香港底子好，只要大家一齊努力、減少內耗、爭拗，迎接國家經濟發展帶來嘅新機遇，香港明天一定會更好。