眾志1年 青春晚宴進帳數萬 非籌款無拍賣 周庭「戀舞」助興

【明報專訊】香港眾志前晚舉行1周年黨慶，好多民主派人士出席。秘書長黃之鋒話，黨慶扣除開支賺咗幾萬元，講明晚宴最主要嘅目的唔係籌款，「所以連拍賣環節都無」，最重要係來賓分享到喜悅同精彩嘅表演，過咗一個快樂晚上。
眾志黨慶可以話係非常青春，有羅冠聰同黃之鋒表演唱歌，周庭仲表演日劇《逃避雖可恥但有用》嘅「戀舞」(口添)！唔少眾志成員執委都好年輕，有人下晝考完DSE晚上準備黨慶，難怪有嘉賓笑住話好有大學迎新營嘅感覺啦。
黨慶嘅嘉賓清一色係民主派人士，立法會議員兼黨主席羅冠聰事後撰文回應，話無邀請高官、大商家及建制派人士，係因為只想將1周年嘅喜悅，毫無保留咁與同路人分享。
吸創黨教訓 「穩打穩札」
1年前眾志由創黨到舉行成立典禮，都不斷甩轆，引起一連串「關公災難」，因此被外界取笑。羅冠聰喺黨慶後有感而發，於facebook寫咗篇文，話由於創黨時甩轆連連，令佢對黨慶晚宴嘅籌備相當緊張，經常提醒黨友「切勿眼高手低」，「我的忠告和指示是穩打穩札，做好基本，然後再想突破」。