踏足港珠澳橋 譚志源興奮自拍

【明報專訊】特首梁振英親自率領嘅粵港澳大灣區訪問團最後一日，團員有機會親自到幾乎完工、明年即將開通嘅港珠澳大橋珠海分段視察，不過可惜呢個重點行程一眾隨團傳媒就無得跟去。


好彩政制及內地事務局長譚志源主動做傳媒之友，提供相片畀一眾行家，仲包括埋佢自己旁若無人嘅興奮自拍相。睇佢揸機高炒嘅姿勢，好明顯都幾識揸角度。獨樂樂不如眾樂樂，譚志源仲拉埋工聯會鄭耀棠、新聞秘書一齊留影，果然係「好青春」。佢之後喺社交媒體分享圖片，大呼：「嘩！企咗喺港珠澳大橋嘅橋面呀！」怪唔得譚志源之前話諗住趁後生，離開政府出去闖下，睇來真係玩心未泯。