樂視旗下易到 創辦人齊「劈炮」

【明報專訊】樂視旗下「Call車App」易到噚日網上就傳申請破產！雖然易到已經即刻否認傳聞，但3位創辦人周航、楊蕓及湯鵬「身體卻很誠實」，噚日宣布聯合辭職，話為咗積極配合樂視平穩過渡、唔想對易到管理現狀造成不必要干擾，同個人名譽再受惡意攻擊，決定忍痛退落嚟。


其實易到被人傳申請緊破產都唔係無原因，因為易到相關人士承認，近日因為系統問題，令到部分司機唔可以喺戶口拎錢，市傳上海已經有律師行發起維權行動，幫過千個受害司機追討。


樂視擬售北京地產項目

個仔唔掂，阿媽樂視都唔得閒理，自己都要四出撲水。有外媒報道樂視計劃出售舊年用約30億元人民幣買入嘅北京地產項目，解決資金緊張問題。周航日前話樂視拎咗公司13億資金，但易到同樂視就急急否認，呢單「羅生門」嘅真相真係得班管理層知。


[小琴密語]