林鄭晤葉劉 獲贈競爭力報告

【明報專訊】候任特首林鄭月娥近日無咩出席公開活動，早前話會約見立法會各黨派嘅佢，近日都開始密密見人，其中參選特首但未能取得足夠提名入閘嘅新民黨主席葉劉淑儀，噚日就同林太單獨見面。不過葉太話見面內容不便透露，究竟林太有無邀請佢入閣或擔任任何公職，真係得兩位阿太先知喇。


葉太噚日中午喺facebook上載佢同林太嘅合照，原來葉太喺會面上，向林太送上匯賢智庫早前發表嘅《香港長遠競爭力研究報告》，佢話期望報告能對林太未來施政有幫助，仲話「林太表示會仔細閱讀」。


葉太話今次同林太會面都約咗好耐，佢係以私人身分見面，主要將份研究報告交畀對方，會面大約半小時。


至於林太早前話會約見立法會各黨派，除咗今次會面，葉太透露新民黨同林太嘅正式會面亦已安排好，稍後會再同對方見面。