3日訪6城 議員話一個「攰」字 穗官員推薦﹕南沙樓抵買

【明報專訊】特首梁振英（CY）籌劃已久嘅大灣區訪問團噚日出發，不過3日內要趕6個城市，兼海、陸、高鐵都有體驗，第一日未完，團員已經大呼「好攰」，民建聯陳恒鑌都話好彩後生先頂得順。另一團員經民聯石禮謙，夜晚8點幾返回酒店已面露疲態，只係同Emily講咗一個「攰」字。


話千呎200萬有交易

雖然行程趕，但團員今次路程都有「驚喜」發現。原來廣州市南沙區區長曾進澤喺車度有特別推薦團員，南沙新樓好抵買，若一個包裝修嘅1000呎屋苑，都係200萬港元。如果將來高鐵整好，搭高鐵去當地都只係半個鐘車程，喺交通便利下，有團員就覺得未嘗唔係香港市民一個置業新選擇。


Emily都有特別問過政制及內地事務局長譚志源，問到有無興趣置業時，佢就大笑數聲，又拋下一句「樓市可升可跌」，提醒大家入市小心啦。


不過，近年廣州樓市熾熱，內地政府亦推出唔少限購措施「辣招」，例如購買房屋之後兩年都唔可以轉手，所以如果香港市民有興趣，都要認真研究一下條例。