梁志祥諷特赦建議：打和！Super！

【明報專訊】民主黨主席胡志偉日前建議同時特赦佔中參與者、七警同退休警司朱經緯，引嚟建制泛民兩邊陣營反彈，民建聯立法會議員梁志祥噚日喺facebook貼圖，不點名抽民主黨水，圖中「日曆」寫上4月17日「宜法治」，但下一日就係「宜特赦」，批評民主黨「龍門任你擺」，更用上近期網絡流行嘅電視節目金句，話「學志偉哥話齋：打和！Super！」

曾接市民求赦警察請願信

至於民建聯，亦喺fb諷刺「民主黨主席不代表民主黨」同「公民黨黨魁不代表公民黨」嘅言論係「神邏輯」。翻查資料，七警案判刑後，梁志祥3月初曾經喺立法會示威區，接收市民要求特赦佔中執勤警察刑事責任嘅信件。


噚日fb上政界唇槍舌創，民主黨副主席羅健熙就幫主席口，話特赦可以討論，亦唔太覺得特赦影響法治，而係「在整個社會氣氛都出事時，將所有相關既（嘅）人和事喺嗰段期間做過的違法嘢抹咗再嚟過」，但強調特赦呢種權力唔可以亂用。