擁智能手機 兩年多60萬人

【明報專訊】政府統計處噚日出版《主題性住戶統計調查第62號報告書》，報告分析港人使用智能手機嘅人數持續上升，有546.8萬10歲以上人士擁有智能手機，佔所有10歲以上人士的85.8%，較兩年前增加8.6百分點。使用智能手機嘅「老友記」亦明顯上升，睇嚟全民進入智能世界嘅年代真係不遠矣。


15至24歲滲透率99.3%

呢份報告書嘅調查喺2016年4月至7月期間進行，抽樣訪問咗約1萬個住戶，搜集資訊科技使用情况，同埋普及程度有關嘅資料。


統計調查結果顯示，智能手機愈來愈流行，2016年有546.8萬10歲以上人士擁有智能手機，較2014年嘅人數多出約60萬人，滲透率亦由2014年嘅77.2%升至2016年85.8%，當中以15至24歲嘅人滲透率最高，達99.3%（見表）。


另外，長者持有智能手機增幅亦特別明顯，喺2016年，大概每5名65歲及以上人士，就有兩人擁有智能手機，相比2014年約4名65歲及以上人士，當中只有1人擁有智能手機。