莫乃光批港IT發展落後獅城 CY：新加坡有拉布議員嗎？

【明報專訊】特首梁振英（CY）噚日同資訊科技界立法會議員莫乃光（Charles）隔空駁火，事緣Charles喺港台英文節目Letter to Hong Kong，批評港府喺智慧城市同資訊科技發展緩慢，落後其他城市，又讚揚新加坡政府有自我批判精神。CY隨即喺facebook撰文反擊，以「反對派」形容泛民議員，反問﹕「新加坡有拉布的議員嗎？莫乃光議員反對拉布嗎？新加坡有香港這樣的反對派議員嗎？」


指倫敦紐約可遙距交咪表費

Charles喺節目上話，政府過去4年做咗3項有關智慧城市嘅顧問研究，然而智慧城市發展無甚進展，舉例倫敦同紐約等地已經可以用手機應用程式，遙距交泊車咪表費，但港府官員就以駁唔到電力去咪表為由，話呢件事做唔成。


CY喺fb反駁，話政府每次向立法會申請撥款，都被「反對派議員拉（布）得沒完沒了」，形容Charles作為資訊科技界議員，「並沒有站在政府推廣科技這邊」。


Charles最後再喺fb批評CY「可否多一刻討論政策，少一刻政治分化」，話新加坡政府會檢討自己不足，但CY從未聽過任何意見，「我不期望你明，只希望下手唔好學你，肯真心聆聽」。