復活節千人學雕兔 破世界紀錄

【明報專訊】復活節假期噚日開始，有1082名中小學生齊齊喺沙田馬場上課學雕兔仔，應節之餘，仲打破咗健力士世界紀錄，成為「最大規模的雕塑課」。負責教授各個同學仔造出創舉嘅本地雕塑家曾章成眼中，小朋友發揮小宇宙，將雕塑材料揉一揉，用膠刀印一印，都可雕出活潑可愛復活兔。今次刷新紀錄嘅雕塑課，係香港賽馬會「同心同步同樂日」活動之一。超過1000個小朋友上完堂，將自己作品整整齊齊放喺一張約10米長枱上，場面壯觀。健力士世界紀錄評審員Charles Warton 即場確認後，向小朋友宣布「大成功」，同時亦向主辦單位頒發證書。馬會主席葉錫安話，計埋今年，已經有超過3000個小朋友喺同樂日打破過健力士世界紀錄。