剪聯航會員卡 莫乃光吸like數百

【明報專訊】美國聯合航空周日一班從芝加哥起飛嘅客機因機位超賣，一名69歲男乘客被警員強行拖走，片段瘋傳，國際社會關注事件，唔少人表明要罷搭聯航。立法會資訊科技界議員莫乃光（Charles）前晚返到屋企，搵番張會員卡出嚟，喺facebook上載短片，影住佢剪爛張聯航會員卡，一晚有幾百個like，唔夠一日有逾1.6萬次瀏覽，唔少網民留言讚佢做得好。


Charles噚日喺立法會話，佢坐咗聯航幾十年，30幾年前去外國讀書都係用佢，話今次事件唔理咩理由都好，咁樣強行拖乘客落機都係好離譜，但佢咁多年嚟就未試過受聯航超賣影響。Charles話，除非聯航短期內會有啲做法令大家睇到佢有改變，否則都無乜理由再坐佢嘅飛機，「睇唔到要考慮再用佢服務」，又話去美國可以選擇其他航空公司。


至於今次剪卡，佢話只係個人抗議行為，無諗過網民反應咁大，證明大家都感到好不滿，按個like表個態。佢又話由於要取消成個會籍手續繁複，暫時就未有計劃處理。