中電高層教駁電纜

【明報專訊】開電器就知電力存在，但未必個個知道電由邊度嚟。中電喺剛過去嘅星期六於理工大學校園搞工作坊，畀公眾體驗親手接駁供電電纜，中電營運總裁蔣東強（右）亦參加，親身示範點樣接駁電纜。


蔣東強話，電纜就好似人體嘅血管，要連接完整嘅網絡，電力先可以好似血液咁輸送到各個器官，而接駁電纜需要非常精細嘅手藝，就好似做「電纜外科手術」咁考功夫。


Emily見到當日參加者，除咗年輕人外仲有一家幾口，同埋銀髮一族，佢哋喺一班中電工程人員指導下，個個都化身為電纜醫生，好畀心機，全神貫注做到滿頭大汗，最終成功接駁電纜。