民協阿基啟明 擬戰九西補選

【明報專訊】青年新政游蕙禎及梁頌恆於上年宣誓風波後被褫奪議員資格，兩個議席懸空至今，雖然政府仲未公布幾時會舉行新界東同九龍西嘅補選，但各政黨已蠢蠢欲動，其中喺立法會無晒議席嘅民協，有意喺九龍西捲土重來，民協主席施德來證實，去年參戰「超級區議會」嘅何啟明，以及轉戰新界西失敗嘅馮檢基，都已向黨表態有意出戰九龍西補選。


施德來話，民協月底會開中委會，相信屆時會討論搞黨內初選問題，包括用咩方式等。除咗民協，民主黨、公民黨都有意派人出戰九西，施德來話早前負責泛民選舉協調嘅民主動力，早前都有問及民協有無意思參與泛民初選，但目前仲未收到回覆。


建制派方面，目前主要民建聯最想派人參選，預料由油尖旺區議會主席葉傲冬及深水埗區議員鄭泳舜之爭，但目前未公布結果。據聞黨內最終決定，知結果嘅只得黨主席李慧琼、前主席譚耀宗及會務顧問溫嘉旋3人，讀者想知咩人參選，相信仲要等吓。