單車籌款悼殉職消防 兒子寫信：爸爸係天使英雄

【明報專訊】人稱「明總」嘅50歲消防總隊目邱少明，上月22日喺馬鞍山吊手岩拯救兩名行山客時，不幸失足墮崖殉職。贐寧社同消防處職工總會等團體，噚日為生前係消防單車隊成員嘅邱少明舉辦單車籌款活動，協助邱少明遺孀同6歲兒子。


公務員事務局長張雲正喺活動致辭時透露，邱少明嘅囝囝寫咗一封信，話對爸爸感到驕傲，形容爸爸係佢心目中嘅英雄同天使，知道爸爸已經喺天堂，會永遠懷念佢。張雲正又話，希望今次事件能夠提醒郊遊人士出發前做好行程規劃，避免同類事件再次發生。


噚日有逾百人參加籌款活動，由大埔海濱公園踩單車至科學園再折返，活動開始前由隊友推住邱少明生前練習用嘅單車到台上，眾人默哀1分鐘。消防處今個星期五將會為邱少明舉辦最高榮譽喪禮。