黃國健何啓明抽中 工聯「攻陷」泛民橫頭磡議辦

【明報專訊】華叔大班梁家傑用過
工聯會立法會議員何啟明同黃國健位於樂富橫頭磡嘅聯合辦事處，噚日開張。呢個辦事處多年嚟都係泛民主派議員嘅囊中物，由司徒華、鄭經翰到公民黨梁家傑都喺同一地方設辦事處，亦係當區唯一嘅泛民議員辦事處。今次被工聯會成功「搶佔」陣地，當區旋即變成「紅噹噹」。
公民黨立法會議員譚文豪其實都有入紙申請租用呢個辦事處，但就被何啟明抽中，何笑言抽中真係好好彩，因為房署喺當區只得一個辦事處可以抽。至於今次同黃國健拍住上開辦事處，係咪為下屆立法會選舉轉戰九東直選鋪路，何啟明強調自己一直都喺九東觀塘有地區服務。
民政事務局長劉江華噚日都有出席辦事處開幕禮，佢致辭時話議員辦事處設喺屋邨內係好接地氣，仲形容由「政治高人」黃國健帶住「政治新人」何啟明，係相得益彰嘅組合。
開幕禮喺辦事處附近一個露天廣場舉行，劉江華坐足全程，完咗仲同黃何兩人行去辦事處一齊切燒豬。