CY問學生﹕想做麻雀定大鵬

【明報專訊】過百個來自基層家庭嘅中小學生，噚日去到禮賓府同特首梁振英（CY，圖中）交流，有同學關注CY卸任後「大計」，CY話正在計劃家庭旅行，亦會繼續關注「一帶一路」嘅發展，仲話即使工作幾十年仲未覺得攰，亦都唔會「hea」，會繼續為社會同國家做事。


CY應傑出青年協會和齊心基金邀請，同100多個來自唔同學校同背景嘅同學交流。CY又用自身經歷勉勵同學，佢話細個生活困苦，食嘅第一啖牛油係由教會派發；佢19歲以前屋企都無獨立廁所，呼籲同學唔好氣餒，要對香港、國家同自己有信心。


CY話現時國家迅速發展，年輕人獲得嘅機會比佢當年多，應該要好好把握「一國兩制嘅便利」。佢又用麻雀同大鵬比喻年輕人嘅將來，話麻雀只會喺門口蹦跳，大鵬可以飛得更高更遠，要年輕人思考吓想做麻雀定大鵬。