青委會委員零出席照留任 陳淑莊問劉江華﹕你哋「神交」？

【明報專訊】民政事務局日前提供青年事務委員會各委員過去一年嘅會議出席率，其中兩人比較「突出」，4次會議都缺席，包括恒地副主席李家誠及香港研究協會總幹事麥燕薇，不過政府上月公布新一屆青委會委員名單，呢兩人依舊留任。噚日立法會特別財委會上，公民黨陳淑莊十分不滿，質疑民政事務局長劉江華如何從呢兩個委員身上吸納意見。佢又質問，對方完全唔開會，係咪即係代表佢唔想做委員，「定係你可以同佢『神交』咁知道咗，佢哋係繼續表達意見？」


劉江華就話，希望所有委員喺出席率方面都可表現理想，強調過去都達到八成左右。但佢承認，個別委員出席率唔理想係唔鼓勵，下次換屆時會考慮不再「取用」。佢又話希望委員會成員來自社會不同界別，尤其重視年輕人加入，過去委任35歲以下人士逐步增至近一半。