李家誠青委會會議零出席率 麥燕薇同無影 兩人今屆繼續留低

【明報專訊】民政事務局回覆立法會議員就政府開支預算問題時，透露青年事務委員會委員喺2016/17年度，主要會議嘅平均出席率有80%。不過，委員會兩名非官方委員，包括恒地副主席李家誠（圖）及香港研究協會總幹事麥燕薇，出席率係0%，即係兩人喺16/17年度從未有開過會。


2016/17年度4次會 劉鳴煒全出席

根據民政事務局書面回覆，青年事務委員會喺16/17年度合共開咗4次會，委員平均出席率80%。委員會主席劉鳴煒出席率係100%。雖然李家誠同麥燕薇出席率係零，但政府喺上月31日公布新一屆青年事務委員會成員名單，李麥二人喺新一屆仍然可以留低。Emily透過公關聯絡李家誠，以及搵過麥燕薇，二人喺截稿前未有回應。


民政局fb 去年度運作開支12.5萬

另外，近年唔少政府部門都陸續用facebook等社交媒體做宣傳工具。民政局透露，由今年1月起，已經聘用承辦商負責提供局方嘅facebook管理服務，2016/17年度運作開支要125,000萬元。至於政府不時會透過社交媒體，向世界各地宣傳香港，局方話政府喺2016/17年度，用咗120萬元喺facebook同YouTube登廣告，宣傳香港。