劉鳴煒表演木箱鼓 「有得揀唔會學」

【明報專訊】協青社噚日喺沙田大會堂舉行青年街舞劇表演，吸引近400名市民出席，候任特首林鄭月娥、政務司長張建宗同港區政協紀文鳳等亦有捧場，青年事務委員會主席劉鳴煒擔任客串嘉賓，表演近年好流行嘅木箱鼓（Cajón），雖然無跳舞，都引嚟一片掌聲。
劉鳴煒之後發表感想，話表演時有啲緊張，因為自己本身唔識打鼓，笑言如果唔係幫協青社，「有得揀絕對唔會學」。現場有唔少家長陪仔女欣賞表演，劉鳴煒就寄語家長，應該畀子女多啲空間同時間，令佢哋可以發揮所長。
林太與表演者上台合照
本地樂隊Supper Moment噚日亦有參與演出，佢哋唱歌嗰陣，林太喺台下舉手助興，狀甚投入，林太完場後更「connect」一眾年輕表演者，同佢哋上台影相留念。