官邸招待基層　陳茂波窮經歷勉兒童自強

【明報專訊】出身基層嘅財政司長陳茂波，前日就喺用咗83萬元裝修嘅官邸，招呼咗十幾個天水圍基層家庭，一共40幾人聚餐。佢噚日就發表題為〈耆樂•童樂•眾樂樂〉嘅網誌，用自身經歷勉勵小朋友，話只要努力學習、自強不息，總可以一步一步達到目標。


指曾失家園 對基層困境「身同感受」

62歲嘅陳茂波話，細個住喺大坑西木屋區，遇過唔少次火災風災，試過失去家園，所以對基層市民面對嘅經濟壓力同生活困境「身同感受」（應為「感同身受」）。佢又勉勵小朋友，「只要努力學習、充實和裝備自己，懷着自強不息的決心和毅力，對未來抱有希望，總可以一步一步達到目標。」


鼓勵大人勿自困愁城

陳茂波又特別提起《周易》嘅「天行健，君子以自强不息」，話小朋友要本着堅毅不屈、永不言敗嘅精神，做出成績，將來學有所成，回饋父母辛勞養育之恩，服務香港社會。


另外，陳茂波鼓勵大人要積極樂觀，遇到困擾時，唔好自困愁城，要守望相助，重申政府會繼續喺房屋、扶貧助弱等方面努力，又會喺下學年大幅增加學前教育嘅經常開支，撥款3億元擴展獎學金和國際青年交流計劃。