譚駿賢出力搞環保 議辦變舊物轉贈處

【明報專訊】社會近年愈嚟愈講環保，工黨屯門區議員譚駿賢噚日喺facebook上載自己地區辦事處嘅相，相裏面有多本二手書，連舊小朋友單車都有（圖），佢話議辦已經變成「二手物轉贈處」。譚駿賢同Emily講番來龍去脈，原來佢2015年當選區議員之後，曾經喺邨內搞交換市集，自此唔少街坊每當有嘢唔要，就會交去佢嘅議辦，如果唔計衣物，到家收得最多嘅係二手書，曾經有人捐過1970年代出版嘅魯迅文集，而最多街坊接收嘅就係愛情小說。


二手書最多 愛情小說最搶手

除咗二手書同單車，譚駿賢話有人捐過陳年快餐店玩具，勾起自己唔少回憶，亦試過有店舖倒閉，捐出大量電話套同電話繩。佢話，幾個月前有女街坊捐咗部陳年打字機畀佢，但對方唔想就咁轉贈，希望睇吓有無博物館肯攞去展覽，譚駿賢笑住話唔知有無博物館肯收，但都會嘗試聯絡。