休假4天 CY仲有十幾日假

【明報專訊】政府噚日公布，特首梁振英（CY）今晚至4月2日下午離港休假4天。特首嘅假期由每年7月起計，CY上一次休假為年初農曆新年休假，計埋今周假期，CY今年度放咗8.5日，以佢一年有22日大假計，餘下3個月任期，佢應仲可以放13.5日。


CY放假期間，由唔使放假嘅政務司長張建宗頂住，做署理特首。出名勤力嘅張司長早前講過，以往做咗9年幾勞工及福利局長，未放過一日假。


另外，CY噚日出網誌，悼念英皇書院嘅陳子鈞學長。CY話陳子鈞任英皇書院同學會會長8年，並曾任專業人士促進現代化協會會長，貢獻良多。佢話陳學長為人風趣幽默，今與世長辭，校友都感茫然。