粉果檔冬菇亭告別 食客豪買千元

【明報專訊】手工粉果同燒賣買少見少，喺大埔廣福邨有一個車仔檔就以手工粉果同燒賣馳名，陪伴大埔街坊逾30載。由炒蝦米、炒沙葛，以至搓粉果皮，都係由78歲嘅王伯包辦。可惜車仔檔家身處嘅「冬菇亭」舖位，要3月底交還畀領展，王伯只營業到今日咋。結業嘅消息吸引咗大批街坊噚日前來回味，王伯好感謝街坊嘅賞識，歎道「如果政府肯保留呢啲懷舊味道就好喇」。
炒蝦米手造燒賣 王伯自豪
見到王伯咁精神飽滿開檔，原來佢已經78歲。多年嚟佢堅持每朝5點到工場炒蝦米、沙葛，又會搓魚肉包燒賣，然後將包好嘅粉果燒賣放入蒸籠，熱騰騰嘅點心就出爐喇。
王伯1960年代從內地來港，佢好驕傲咁話自己「瓣瓣都做過」，魚蛋粉、牛雜牛腩、雞蛋仔都難唔到佢。王伯與太太1984年到廣福邨擺車仔檔，輾轉到現時嘅冬菇亭舖位營業，但因為承租呢個舖位嘅商戶畀唔起領展要求嘅200幾萬裝修費，所以連同王伯車仔檔嘅生意，做埋今日就結業。
嘆「讓路畀大集團」
「古老嘅嘢全部都畀人淘汰，要讓路畀大集團，我啲手藝係傳統傳落嚟㗎，連鎖店搵都搵唔到。」王伯話繼續搵地方經營嘅意欲唔大，或者聽吓兩個仔嘅意見享享清福，佢笑笑口話：「有適合嘅地方先繼續做，無咪退休囉！」
結業消息傳出後，噚日晏晝有大批食客嚟買點心，一度有成10人排隊，王伯同老婆忙到無停手，仲有個食客一下子買咗逾千元嘅粉果燒賣，令王伯又驚又喜。結果粉果燒賣噚日傍晚6點已經賣清光，王伯話如果想食，就要今日下午3點幾去買就最穩陣喇。