荃灣港安推時段式收費ICU

【明報專訊】荃灣港安醫院重建完成，已經開到300張牀，醫院高層大計多多，醫務總監陳龍威醫生噚日同Emily講，佢哋將會開設有成10張牀嘅深切治療病房（ICU），請駐院嘅ICU醫生，其中更會推出時段式收費，為高風險手術術後病人提供更適切觀察，一節大約4粒鐘，收費幾千蚊；新院亦具備開設正規急症室嘅硬件，將會開設急症室服務。


有新院，當然會強化專科，如心臟科、泌尿科、兒科、婦科同骨科等。陳龍威仲話，情緒病喺香港愈來愈受重視，佢哋都請咗精神科醫生，開設情緒管理部門，協助情緒病病人。


醫院加病牀，全院人手今年亦已增加咗200人，去到800，咁啱最近有新私家醫院開，掀起搶人潮；院長凌宏寶話佢哋都受到影響，除用錢留人，佢哋會喺工作環境做多啲，令員工做得更開心。其中一招係用更多錢請通宵更職員，通宵更有人固定返，其他唔想返通宵嘅醫護就會減少輪通宵機率。而護士對病人比例定喺1對6，較其他醫院低，護士做嘢無咁大壓力，病人又可得到更好嘅服務。


凌宏寶話荃灣港安主要服務新界西街坊，收費唔會訂得太高。佢哋並設有60張低收費病牀，100蚊一晚，包埋3餐。