世界家庭醫生組織 李國棟當選主席

【明報專訊】全球面對人口老化問題，慢性病治療愈來愈重要，家庭醫學出身嘅香港醫學專科學院（醫專）主席李國棟近期就有新動向，最近去咗巴西競逐世界家庭醫生組織（WONCA）主席之位，噚日就傳來喜訊，話已經當選，李醫生話今次當選係好大鼓舞，證明香港家庭醫生都可以喺國際上爭取領導地位。


仲喺巴西嘅李醫生透過短訊同Emily講，自己將會喺2018年上任，佢話要全球130多個國家或地區信任佢嘅能力、經驗同溝通能力並唔容易，希望今次競選結果可以提升家庭醫學喺香港同內地嘅地位，以及對家庭醫生有鼓勵作用。講番呢個組織，其實已有44年歷史，目前至少有131個成員地區、超過50萬名家庭醫生會員，組織會定期舉辦國際家庭醫學交流會議，李醫生則曾經喺2007至2013年間做過亞太區嘅主席。