4年前宣誓 CY讀漏「香港」

【明報專訊】青政議員梁頌恆、游蕙禎嘅宣誓風波愈鬧愈大。早喺2012年宣誓就任嘅特首梁振英（CY），噚日都被傳媒「翻舊帳」，發現佢宣誓時都有出錯，Emily翻睇宣誓儀式直播片段，發現梁特首真係有讀漏「香港」二字。特首辦至噚晚截稿前未有回應事件。


特首辦未有回應

根據《宣誓及聲明條例》，特首宣誓就職嘅誓辭如下﹕「本人就任中華人民共和國香港特別行政區行政長官，定當擁護《中華人民共和國香港特別行政區基本法》，效忠中華人民共和國香港特別行政區，盡忠職守，遵守法律，廉潔奉公，為香港特別行政區服務，對中華人民共和國中央人民政府和香港特別行政區負責。」


Emily翻睇當年宣誓片段，發現CY喺最後一句讀漏「香港」二字，令誓辭變成「對中華人民共和國中央人民政府和特別行政區負責」。早前民建聯議員黃定光，同樣喺宣誓時漏讀「香港」兩個字要求重新宣誓兼道歉，唔知上任4年多嘅特首又點睇讀漏誓辭內容一事呢？