林鄭月娥賀《明報月刊》50歲

【明報專訊】由著名小說家查良鏞（金庸）喺1966年創辦嘅《明報月刊》，噚晚舉行創刊50周年晚宴，《明月》社長兼世界華文媒體執行主席張曉卿仲同政務司長林鄭月娥主持切蛋糕儀式。林太致辭時話，以本地生產總值嘅附加值而言，本港創意產業過去10年平均有8.6%增長，但出版界不升反跌，認為《明月》能喺呢個環境「生存」殊不簡單。


《明月》晚宴邀得唔少貴賓出席，除咗林太，仲有副民政事務局長許曉暉、浸大副校長周偉立、著名媒體人劉天賜同鋼琴家劉詩昆等人，台灣前總統馬英九都有錄影片段祝賀《明月》創刊50年。


林太致辭時話，相信「在座好多朋友都同我一樣，睇住《明報月刊》一齊成長」，認為《明月》涵蓋文化、學術、思想等社會範疇，喺不斷變化嘅世代中「始終如一、堅守初衷，猶如一道清流」。佢又提及，前日為特首梁振英下年發表嘅《施政報告》諮詢包括出版界嘅創意產業界別，仲話無論表演藝術、電腦設計、動漫電影界都對前景充滿盼望，唯獨出版界「非常擔心後繼無人」，認為《明月》作為一份學術文化月刊，要喺商業社會「生存」，仲要秉持公正、持平、獨立同貫徹高水平作品，更加不容易。


張曉卿話，《明月》數十年努力堅持「為正義、真理發聲」，彷彿係「天地中不屈的星宿」，「只要她還有未完成的歷史使命，她還是要繼續燃燒下去」，又承諾未來會拚命「辦好她」。Emily喺度同同事祝《明月》50歲生日快樂！