葉建源選戰花千元化妝

【明報專訊】立法會選舉一大重點就係形象工程，唔少候選人都花盡心思喺選舉照上。根據選舉開支申報，Emily發現男候選人都好注重外表，好似教育界葉建源就花咗1000蚊化妝、5000蚊拍硬照。


葛珮帆名單花226萬

女候選人方面更加唔敢鬆懈，參選新界東嘅民建聯葛珮帆（EQ）名單就花咗1.75萬元影相，但包唔包執相、美圖服務，就不得而知。今屆新東戰况激烈，EQ毫不手軟，整個選舉工程花費226萬多元，不過佢唔使自掏腰包，全部由民建聯資助。


除咗民建聯集體分攤嘅的士、巴士、港鐵廣告外，喺上年區議會選舉爆冷落敗嘅EQ都加多兩錢肉緊，立會選舉期間，佢喺東鐵燈箱、大老山及將軍澳隧道，都有額外再賣廣告。


相比之下，自動當選嘅建制派「班長」廖長江競逐商界（二）輕鬆好多，選舉只係花咗1.2萬蚊，大部分用嚟寄選舉郵件。