譚校長持股藝能娛樂 申上創業板

【明報專訊】一向同「殼王」陳國強同「霍大班」霍建寧老友嘅「校長」譚詠麟（圖），睇嚟都學咗唔少嘢，佢有份持股嘅演唱會籌辦公司藝能娛樂，近日遞咗申請想喺創業板上市，不過上市前梗係派錢先啦，公司兩個月內派咗兩年股息，合共2700萬元，不過以譚校長今年先入股，持股約6.67%計，除非老闆格外開恩，否則應該只可以袋80萬元。


根據文件，藝能娛樂主要從事演唱會籌辦及製作業務，曾經籌辦或製作演唱會包括《譚詠麟銀河歲月40載》、《溫拿》、《左麟右李》等（無錯，好多都係譚校長嘅），截至今年4月底止年度純利約1942.1萬元，而截至今年7月底止一季度就賺約257.9萬元。


藝能娛樂今年8月及10月兩個月內，大手派發今明兩年股息，用返持股量計，大股東葉偉忠及張偉鋒至少袋1800萬，而譚詠麟今年6月先用300萬元收購6.67%股份，理論上無權獲派去年股息，不過今年8月嗰1200萬元股息，佢話唔定可佔80萬元。當然啦，譚生咁出名又咁俾面，老闆肯俾多啲都唔定呢！


email: piano@mingpao.com

[小琴密語]