CY林鄭財爺同枱 各有各忙 曾俊華：無人discourage我

【明報專訊】經民聯噚晚舉行4周年晚宴，特首梁振英（CY）一早到場，政務司長林鄭月娥同財爺曾俊華就姍姍來遲，令到3名熱門特首人選無機會同台合照。3人入席後出現「三角關係」，CY坐喺兩司長對面，3人成晚無乜眼神交流。CY離場後，財爺滿場飛，記者問佢中央有無「discourage（唔鼓勵）」佢辭職參選，佢就話「無人discourage我」。


經民聯4周年晚宴同場

晚宴除咗有政府3巨頭外，唔少局長同政商界猛人都有捧場，好似律政司長袁國強、運房局長張炳良、商經局長蘇錦樑、立法會前主席曾鈺成、海洋公園前主席盛智文等，來自泛民嘅公民黨郭榮鏗同楊岳橋都有露面。


Emily見到CY、林鄭同財爺似乎無乜交流，但3人各有粉絲爭住同佢哋合照「集郵」。作為超級梁粉嘅歌星「肥媽」（Maria Cordero）席間大獻歌喉，又為CY打氣，高呼自己係中國嘅香港人，CY聞言拍掌叫好。而肥媽唱《勇敢的中國人》時，又邀請CY唱一句「做個勇敢中國人」，CY都好合作。


林鄭財爺與嘉賓唱歌

CY走後，林鄭同財爺都唔輸蝕，喺經民聯邀請下，同其他局長、嘉賓一齊唱《獅子山下》，之後仲有全男班一齊唱My Way，林鄭就喺台下做觀眾，Emily見佢曾低頭望表，唔知係咪趕住走，話晒當時都接近10點鐘。