睇賽馬 指點選舉 鍾樹根評大主席「扭扭擰擰」

【明報專訊】特首跑馬仔如箭在弦，各路人馬正喺「沙圈」踱步，但至今正式宣布參選特首嘅只得退休法官胡國興。民建聯前立法會議員鍾樹根（樹根）噚日喺facebook發文，話自己上個月去武漢參觀全國賽馬比賽，並疑似借題發揮，問網友香港5年一次跑馬仔，「你準備好未？」，又形容「大法官搶閘，財神爺亦不甘寂寞」，但「大主席扭扭擰擰，仲未有表示」。


「大法官搶閘財神爺不甘寂寞」

樹根喺帖文加上幾個標籤，包括大法官、財神爺、前大主席、前局長，同「仲有想冧莊嘅…」，不過一律無指名道姓。佢形容朋友喺武漢拉頭馬好威水，至於「香港跑馬仔，邊個最威水呢？買定花生落重注」。


落重注邊個？ 「睇定啲先」

Emily問樹根講緊邊個，例如「前大主席」係咪代表遲遲未明確表態嘅立法會前主席曾鈺成呢？樹根無正面回應，笑住話「你話係就係，唔係就唔係」，對於自己會喺特首選舉為邊個「落重注」，佢話「睇定啲先」。多個熱門特首人選都未明確公布意向，係咪太遲呢？樹根話相信各有盤算，至於各人係咪等緊北京開綠燈，佢就話「你自己諗啦」。